وزیرِ اعظم شہباز شریف کی دعوت پر اردن کے بادشاہ شاہ عبداللہ دوم اپنے دو روزہ سرکاری دورے کے لیے اسلام آباد پہنچ گئے۔ نور خان ایئربیس پر ان کا پرتپاک استقبال کیا گیا، جس میں صدر مملکت آصف علی زرداری، وزیرِ اعظم محمد شہباز شریف، وفاقی وزیر موسمیاتی تبدیلی مصدق ملک اور وزیرِ مملکت برائے تعلیم وجیہہ قمر بھی موجود تھے۔
بادشاہ شاہ عبداللہ دوم کا دورہ پاکستان اور اردن کے درمیان دیرینہ برادرانہ تعلقات کی عکاسی کرتا ہے اور اس کا مقصد دونوں ممالک کے سیاسی، اقتصادی اور ثقافتی روابط کو مزید مضبوط کرنا ہے۔
وزیراعظم ہاؤس پہنچنے پر شاہ عبداللہ دوم کو مسلح افواج کے دستے نے گارڈ آف آنر پیش کیا۔ اس موقع پر وزیرِ اعظم شہباز شریف کے ساتھ دو طرفہ ملاقاتیں اور وفود کی سطح پر مذاکرات بھی متوقع ہیں۔
یہ دورہ پاکستان اور اردن کے درمیان دوطرفہ تعاون کے دائرہ کار کو بڑھانے اور باہمی تعلقات کو مزید مستحکم کرنے میں اہم کردار ادا کرے گا۔
بادشاہ شاہ عبداللہ دوم کی آمد سے دونوں ممالک کے درمیان سیاسی اور اقتصادی تعلقات کو فروغ دینے کی امید ہے، اور یہ دورہ مستقبل میں تعاون کے نئے مواقع فراہم کرے گا
