پاک فوج کے شعبہ تعلقات عامہ (آئی ایس پی آر) کے مطابق، سکیورٹی فورسز نے 13 سے 15 اکتوبر کے دوران خیبرپختونخوا کے مختلف علاقوں میں کامیاب کارروائیاں کیں، جن کے دوران 34 دہشتگرد مارے گئے۔
بیان کے مطابق، یہ آپریشنز شمالی وزیرستان، جنوبی وزیرستان اور ضلع بنوں میں کیے گئے۔ شمالی وزیرستان کے علاقے اسپن وام میں دہشتگردوں کی موجودگی کی اطلاع پر کارروائی کی گئی، جہاں فائرنگ کے شدید تبادلے میں 18 دہشتگرد ہلاک ہوئے۔
اسی طرح جنوبی وزیرستان میں انٹیلی جنس معلومات کی بنیاد پر کیے گئے آپریشن میں 8 دہشتگرد مارے گئے، جب کہ ضلع بنوں میں ہونے والی تیسری کارروائی میں مزید 8 دہشتگردوں کو ہلاک کیا گیا۔
آئی ایس پی آر کا کہنا ہے کہ ان جھڑپوں میں مارے جانے والے دہشتگرد بھارتی سرپرستی میں کام کرنے والے فتنہ الخوارج سے تعلق رکھتے تھے۔
علاوہ ازیں، افغان سرحد کے قریب اسپن بولدک میں بھی پاک فوج نے افغان طالبان اور خوارج کے حملے کو ناکام بنا دیا، جس دوران 20 طالبان ہلاک ہوئے۔
