انڈین پریمیئر لیگ (آئی پی ایل) 2025 کو بھارت اور پاکستان کے درمیان بڑھتی ہوئی سرحدی کشیدگی کے باعث معطل کر دیا گیا ہے۔ بھارتی کرکٹ کنٹرول بورڈ (بی سی سی آئی) نے یہ فیصلہ موجودہ صورتحال کے پیش نظر کیا ہے اور جلد ہی اس حوالے سے باضابطہ اعلان متوقع ہے۔
یہ فیصلہ اس وقت سامنے آیا جب جمعرات کو دھرم شالہ میں پنجاب کنگز (PBKS) اور دہلی کیپیٹلز (DC) کے درمیان جاری میچ کو پہلی اننگز کے دوران ہی منسوخ کرنا پڑا۔ سیکیورٹی خدشات اور خطے میں ہوائی اڈوں کی بندش کے بعد دونوں ٹیموں کے کھلاڑیوں اور سپورٹ اسٹاف کو جمعہ کی صبح ایک خصوصی ٹرین کے ذریعے دہلی پہنچایا گیا۔
آئی پی ایل 2025 میں اب تک 58 میچ کھیلے جا چکے ہیں، جن میں دھرم شالہ کا منسوخ شدہ میچ بھی شامل ہے۔ گروپ مرحلے کے باقی 12 میچز لکھنؤ (2)، حیدرآباد، احمد آباد (3)، دہلی، چنئی، بنگلورو (2)، ممبئی، اور جے پور میں کھیلے جانے تھے، جب کہ پلے آف میچز حیدرآباد اور کولکتہ میں شیڈول تھے۔
ابھی تک یہ واضح نہیں ہے کہ لیگ کب دوبارہ شروع ہوگی یا آیا اس سال کے سیزن کو مکمل طور پر منسوخ کیا جائے گا۔ بی سی سی آئی کی جانب سے اس حوالے سے جلد ہی مزید تفصیلات سامنے آنے کی توقع ہے۔
