حماس کے عہدیدار باسم نعیم نے کہا ہے” غزہ برائے فروخت نہیں ہے۔غزہ فلسطینی سرزمین کا اٹوٹ حصہ ہے۔ یہ کھلی منڈی میں برائے فروخت کوئی جائیداد نہیں ہے۔”
یہ بات انہوں نے امریکی صدر ڈونلڈ ٹرمپ کے اس بیان پر تبصرہ کرتے ہوئے کہی جس میں انہوں نے اس علاقے کو “حاصل” کرنے اور اسے “آزاد علاقہ” بنانے کی خواہش کا اظہار کیا تھا۔ حماس کے سیاسی بیورو کے رکن باسم نعیم نے مزید کہا کہ غزہ میں امداد کی ترسیل اسرائیل کے ساتھ مذاکرات کے لیے “کم از کم” شرط ہے۔
یاد رہے کہ امریکی صدر ڈونلڈ ٹرمپ نے جمعرات کو قطر میں ایک کاروباری اجلاس کے دوران ایک بار پھر غزہ کی پٹی پر کنٹرول حاصل کرنے کی خواہش کا اظہار کیا اور کہا کہ امریکہ اسے “آزاد علاقہ” بنائے گا، فلسطینی علاقوں میں بچانے کے لیے کچھ نہیں بچا ہے۔
