پاکستان کے وفاقی وزیرِ داخلہ محسن نقوی نے جمعرات کو امریکی سفیر نٹالی اے بیکر کو یقین دہانی کرائی ہے کہ امریکہ اور ایران کے درمیان اسلام آباد میں ہونے والے اہم مذاکرات کے موقع پر تمام غیر ملکی معزز مہمانوں کو فول پروف سکیورٹی فراہم کی جائے گی۔
وزارتِ داخلہ کے بیان کے مطابق، ملاقات کے دوران وزیرِ داخلہ نے بتایا کہ امریکی نائب صدر جے ڈی وینس، مشرقِ وسطیٰ کے لیے امریکی خصوصی نمائندہ اسٹیو وٹکوف اور جیرڈ کشنر پاکستان کے ‘خصوصی مہمان’ ہوں گے۔ انہوں نے کہا کہ تمام غیر ملکی وفود کو ہر لحاظ سے مکمل سکیورٹی فراہم کرنے کے لیے جامع منصوبہ تیار کیا گیا ہے۔
امریکی سفیر نے اس موقع پر پاکستان کے سفارتی کردار کو سراہا۔
واضح رہے کہ امریکہ اور ایران کے درمیان دو ہفتوں کی جنگ بندی کے بعد ہفتہ کے روز اسلام آباد میں براہِ راست مذاکرات متوقع ہیں، جس سے 28 فروری سے جاری کشیدگی میں وقتی وقفہ آیا ہے۔
پاکستانی اخبار ڈان کی رپورٹ کے مطابق، مذاکرات سے قبل 30 رکنی امریکی پیشگی ٹیم اسلام آباد پہنچ چکی ہے تاکہ سکیورٹی انتظامات کا جائزہ لیا جا سکے۔ اس حوالے سے اسلام آباد اور راولپنڈی میں جمعرات اور جمعہ کو مقامی تعطیلات کا اعلان بھی کیا گیا ہے۔
حکام کا کہنا ہے کہ ریڈ زون کو مکمل طور پر سیل کیا جائے گا جبکہ فیصل ایونیو سے شروع ہونے والا ہائی سکیورٹی زون بھی وفود کی نقل و حرکت کے مطابق بند رکھا جائے گا۔ بعض داخلی راستے بھی بند کیے جائیں گے اور وفود کو بلیو بک کے تحت وی وی آئی پی پروٹوکول فراہم کیا جائے گا۔
رپورٹ میں کہا گیا ہے کہ ایک اہم ہوٹل کو سرکاری ہدایات پر خالی کرا کے وفود کے لیے مخصوص کر دیا گیا ہے، جبکہ ہسپتالوں اور ریسکیو اداروں کو ہائی الرٹ کر دیا گیا ہے اور عملے و ضروری سامان کی دستیابی یقینی بنانے کی ہدایات دی گئی ہیں۔
اسلام آباد پولیس نے ٹریفک ایڈوائزری جاری کرتے ہوئے شہریوں کو ہدایت کی ہے کہ غیر ملکی وفود کی آمد و رفت کے باعث ایکسپریس ہائی وے پر متبادل راستے اختیار کریں اور ٹریفک پولیس سے تعاون کریں۔
دوسری جانب ایرانی صدر مسعود پزشکیان نے بھی اسلام آباد میں ہونے والے ان مذاکرات میں شرکت کی تصدیق کی ہے، جبکہ وائٹ ہاؤس کی ترجمان کیرولین لیویٹ کے مطابق امریکہ نے بھی باضابطہ طور پر مذاکرات میں شرکت کا اعلان کر دیا ہے۔
