نو منتخب امریکی صدر ڈونلڈ ٹرمپ کے مشیر ایلون مسک نے اقوام متحدہ میں ایران کے مستقل مندوب امیر سعید ایراوانی سے ایک خفیہ ملاقات کی ہے۔ یہ ملاقات امریکا اور ایران کے درمیان کشیدگی کم کرنے کے حوالے سے اہم سمجھی جارہی ہے۔
امریکی میڈیا کی تصدیق اور ملاقات کی تفصیلات
امریکی میڈیا کے مطابق، دو ایرانی حکام نے ایلن مسک اور سفیر ایراوانی کے درمیان ملاقات کی تصدیق کی ہے۔ ذرائع کے مطابق، یہ ملاقات نیویارک میں ایک خفیہ مقام پر ہوئی اور تقریباً ایک گھنٹہ جاری رہی۔ اس ملاقات سے بائیڈن انتظامیہ کے نمائندوں کو آگاہ نہیں کیا گیا تھا۔ رپورٹس کے مطابق، ایلون مسک نے ملاقات کی درخواست کی تھی جبکہ مقام کا انتخاب ایرانی سفیر نے کیا۔
ایران کی امریکی پابندیاں ختم کرنے کی درخواست
ایرانی حکام کا کہنا ہے کہ اس ملاقات میں سفیر ایراوانی نے ایلون مسک پر زور دیا کہ وہ امریکی وزارت خزانہ پر ایران پر عائد پابندیاں ہٹانے کے لیے دباؤ ڈالیں۔ انہوں نے ایلون مسک کو تہران میں کاروباری مواقع کے حوالے سے بھی دعوت دی۔
ایرانی مشن کی تردید
ایرانی مشن نے اس ملاقات کی تردید کی ہے، تاہم ایلون مسک کی ٹیم نے اس حوالے سے تاحال کوئی تبصرہ نہیں کیا ہے۔ ٹرمپ کے کمیونیکیشن ڈائریکٹر اسٹیون شیئنگ نے کہا کہ وہ ایسی نجی ملاقاتوں پر تبصرہ نہیں کریں گے۔
ٹرمپ کی ترجمان کیرولائن لیو نے کہا کہ امریکی عوام نے ٹرمپ کو اعتماد کے ساتھ منتخب کیا ہے تاکہ وہ ملک کو امن کی جانب واپس لے کر آئیں۔ ڈونلڈ ٹرمپ عہدہ سنبھالنے کے بعد اسی سمت میں کام کریں گے۔
ایران اور امریکا کے تعلقات میں کشیدگی کی تاریخ
ڈونلڈ ٹرمپ نے اپنے پہلے دور صدارت میں ایران نیوکلیئر ڈیل کو ختم کیا اور ایران پر مزید پابندیاں عائد کی تھیں۔ اس کے علاوہ، انہوں نے ایرانی جنرل قاسم سلیمانی کے قتل کا حکم دیا تھا جس کے بعد ایران کے سپریم لیڈر نے ٹرمپ انتظامیہ کے ساتھ مذاکرات ختم کردیے تھے۔
ایران کے وزیر خارجہ کا مذاکرات کے ذریعے اختلافات ختم کرنے پر زور
ایران کے وزیر خارجہ عباس عراقچی نے حال ہی میں اقوام متحدہ کے ایٹمی واچ ڈاگ کے سربراہ سے ملاقات کی اور کہا کہ ایران مذاکرات کے ذریعے اختلافات ختم کرنے پر یقین رکھتا ہے۔ انہوں نے زور دیا کہ ایران پرامن نیوکلیئر پروگرام کے حوالے سے مذاکرات کے لیے ہمیشہ تیار ہے۔
ٹرمپ کابینہ میں ایلون مسک اور وویک راماسوامی کی تعیناتی
چند روز قبل، ڈونلڈ ٹرمپ نے اعلان کیا تھا کہ ان کی نئی کابینہ میں ایلون مسک اور وویک راماسوامی کو گورنمنٹ ایفیشینسی کے محکمے کی ذمہ داری سونپی جائے گی۔
