ماہرینِ غذائیت کا کہنا ہے کہ سیب کو جوس بنانے کے بجائے پورا سیب کھانا صحت کے لیے زیادہ فائدہ مند ہے۔ جب سیب کو جوس میں بدلا جاتا ہے تو اس میں موجود فائبر ضائع ہو جاتا ہے، جبکہ فائبر نظامِ ہاضمہ کو بہتر بنانے اور جسم کی مجموعی صحت کے لیے نہایت ضروری ہوتا ہے۔
اس کے برعکس جوس میں صرف شکر رہ جاتی ہے جو نہ صرف وزن میں اضافہ کر سکتی ہے بلکہ شوگر کے مریضوں کے لیے نقصان دہ بھی ثابت ہو سکتی ہے۔
ایک نئی تحقیق، جو امریکن جرنل آف کلینیکل نیوٹریشن میں شائع ہوئی ہے، کے مطابق روزانہ ایک سیب کھانے والے افراد میں دل کی بیماریوں کا خطرہ بیس فیصد تک کم ہو جاتا ہے۔
اس کی ایک بڑی وجہ سیب میں موجود قدرتی غذائی اجزاء، اینٹی آکسیڈنٹس، اور فائبر ہیں جو دل کی شریانوں کو مضبوط رکھتے ہیں اور خون میں مضر چربی کو کم کرتے ہیں۔
ماہرین نے یہ بھی کہا ہے کہ سیب کھانے کا سب سے بہتر وقت صبح کا ہے۔ ناشتے میں سیب شامل کرنے سے جسم کو دن کی ابتدا میں توانائی ملتی ہے، معدہ فعال ہوتا ہے اور نظامِ ہضم بہتر طریقے سے کام کرتا ہے۔ اس کے علاوہ دن بھر جسم میں تازگی اور چستی بھی برقرار رہتی ہے۔
شوگر کے مریضوں اور وزن کم کرنے کے خواہش مند افراد کو سیب جوس کی بجائے مکمل سیب کھانے کی ترغیب دی گئی ہے تاکہ وہ غیر ضروری کیلوریز اور شکر سے بچ سکیں۔
ماہرین کے مطابق قدرتی پھلوں کو اصل حالت میں کھانا ان کا اصل فائدہ حاصل کرنے کا بہترین طریقہ ہے، اور سیب ایک ایسا پھل ہے جو روزمرہ غذا کا لازمی حصہ ہونا چاہیے۔
