بنگلہ دیش کے دارالحکومت ڈھاکہ میں پیر کی صبح فضائی آلودگی کی سطح تشویشناک حد تک ریکارڈ کی گئی، جہاں ایئر کوالٹی انڈیکس (AQI) 131 تک پہنچ گیا۔
اعداد و شمار کے مطابق صبح 8 بج کر 15 منٹ پر شہر دنیا کے ان شہروں میں نویں نمبر پر تھا جہاں ہوا کا معیار سب سے زیادہ خراب ہے۔ انڈیکس کے مطابق ڈھاکہ کی فضا کو حساس افراد کے لیے غیر صحت بخش قرار دیا گیا، جس سے بچوں، بزرگوں اور مریض افراد کے لیے صحت کے خطرات بڑھ سکتے ہیں۔
رپورٹ کے مطابق چیانگ مائی، لاہور اور دہلی بالترتیب 198، 184 اور 166 انڈیکس نمبر کے ساتھ فہرست میں سرفہرست رہے۔
ماہرین کے مطابق 50 سے 100 کے درمیان اے کیو آئی کو درمیانہ تصور کیا جاتا ہے، جبکہ 101 سے 150 تک کی سطح حساس افراد کے لیے مضر ہوتی ہے۔ 151 سے 200 غیر صحت بخش، 201 سے 300 انتہائی غیر صحت بخش اور 300 سے زائد کو خطرناک قرار دیا جاتا ہے۔
ایئر کوالٹی انڈیکس ایک ایسا پیمانہ ہے جو روزانہ کی بنیاد پر ہوا کے معیار اور اس کے انسانی صحت پر ممکنہ اثرات کو ظاہر کرتا ہے۔ بنگلہ دیش میں یہ انڈیکس پانچ بڑے آلودہ عناصرکی بنیاد پر مرتب کیا جاتا ہے۔
ڈھاکہ طویل عرصے سے فضائی آلودگی کے مسئلے کا شکار ہے، جہاں سردیوں کے موسم میں صورتحال مزید خراب ہو جاتی ہے جبکہ مون سون کی بارشوں کے دوران بہتری آتی ہے۔
عالمی ادارہ صحت کے مطابق فضائی آلودگی ہر سال دنیا بھر میں تقریباً 70 لاکھ اموات کا سبب بنتی ہے، جن میں فالج، دل کے امراض، پھیپھڑوں کی بیماریوں اور سانس کے شدید انفیکشن شامل ہیں۔
