امریکہ کی معروف ٹیکنالوجی کمپنی ایپل نے اپنے جدید اسمارٹ فون “آئی فون ایئر” کو باضابطہ طور پر متعارف کروا دیا ہے، جسے کمپنی کی جانب سے اب تک کا سب سے باریک، سب سے ہلکا وزن رکھنے والا اور سب سے زیادہ طاقتور آئی فون قرار دیا جا رہا ہے۔
کمپنی کے جاری کردہ اعلان کے مطابق اس ماڈل کی ابتدائی قیمت 999 امریکی ڈالر مقرر کی گئی ہے، جو اسے دیگر ماڈلز کے مقابلے میں ایک خاص مقام دیتا ہے۔ ایپل کا کہنا ہے کہ یہ نیا فون نہ صرف اپنے جدید، دیدہ زیب اور نفیس ڈیزائن کی بدولت نمایاں ہے بلکہ اپنی ساخت میں پچھلے تمام آئی فون ماڈلز سے کہیں زیادہ مضبوط اور پائیدار بھی ہے۔
آئی فون ایئر کو صارفین کی پسند اور ضرورت کو مدنظر رکھتے ہوئے چار خوبصورت اور پرکشش رنگوں میں پیش کیا گیا ہے، جن میں اسپیس بلیک، کلاؤڈ وائٹ، لائٹ گولڈ اور اسکائی بلیو شامل ہیں، تاکہ ہر صارف اپنی ذاتی ترجیح کے مطابق رنگ منتخب کر سکے۔
اس فون میں بنیادی طور پر 256 جی بی اسٹویج فراہم کی گئی،تاہم ان صارفین کے لیے جو زیادہ ڈیٹا محفوظ کرنا چاہتے ہیں 1 ٹیرا بائٹ کے آپشن بھی فراہم کیے گئے ہیں۔
ایپل کے مطابق اس نئے ماڈل میں کیمرے سے متعلق جدید فیچرز شامل کیے گئے ہیں، جو نہ صرف عام تصاویر لینے کے تجربے کو بہتر بناتے ہیں بلکہ ویڈیو ریکارڈنگ کے شعبے میں بھی اسے ایک اعلیٰ درجہ کی ڈیوائس بناتے ہیں۔
علاوہ ازیں، فون کی بیٹری کو اس انداز میں تیار کیا گیا ہے کہ یہ پورے دن بغیر کسی رکاوٹ کے کارکردگی دکھانے کی صلاحیت رکھتی ہے، جسے کمپنی نے “آل ڈے بیٹری لائف” کا نام دیا ہے۔
ایپل کے چیف ایگزیکٹو آفیسر ٹم کک نے اس نئے آئی فون ایئر کو “آئی فون کی تاریخ میں سب سے اہم اور بڑا قدم” قرار دیا ہے، جس سے ظاہر ہوتا ہے کہ کمپنی اس ماڈل کے ذریعے اپنے اسمارٹ فونز کی دنیا میں ایک نیا معیار متعارف کرانے کی کوشش کر رہی ہے۔
