برطانیہ کی ایک مقامی اسٹارٹ اپ کمپنی اوپن بائیونکس نے دنیا کا پہلا وائرلیس اور واٹر پروف بائیونک بازو تیار کر کے طبّی ٹیکنالوجی میں نئی تاریخ رقم کر دی ہے۔ اس جدید روبوٹک بازو کو “ہیرو بائیونک آرم” کا نام دیا گیا ہے، جو نہ صرف پہننے والے کے ساتھ کام کرتا ہے بلکہ اس سے علیحدہ رہ کر بھی افعال انجام دینے کی صلاحیت رکھتا ہے۔
چار سال کی محنت کے بعد تیار کیے جانے والے اس بازو کو دنیا کا سب سے تیز رفتار، طاقتور اور ہلکا وزن رکھنے والا بائیونک آلہ قرار دیا جا رہا ہے۔
اوپن بائیونکس کی شریک بانی اور سی ای او سمانتھا پین کے مطابق: “یہ بائیونک بازو موجودہ دستیاب مصنوعی ہاتھوں کے مقابلے میں دو گنا زیادہ تیز اور مضبوط ہے۔ سب سے اہم بات یہ ہے کہ یہ پہلی بار مکمل طور پر واٹر پروف اور وائرلیس ڈیوائس ہے، جو اس صنعت میں انقلابی تبدیلی لانے جا رہی ہے۔”
اوپن بائیونکس نے 2014 میں اپنے سفر کا آغاز کیا تھا اور اب تک دنیا بھر میں 1000 سے زائد افراد کو اپنی جدید مصنوعات سے مستفید کیا ہے۔ کمپنی کا ماڈل تھری ڈی اسکیننگ اور تھری ڈی پرنٹنگ پر مبنی ہے، جس کے ذریعے معذور افراد کے لیے ان کی ضروریات کے مطابق بائیونک بازو تیار کیے جاتے ہیں — جو نہ صرف تکنیکی لحاظ سے قابلِ اعتماد ہوتے ہیں بلکہ جمالیاتی لحاظ سے بھی متاثر کن ہوتے ہیں۔
یہ پیش رفت معذور افراد کے لیے خود مختاری اور اعتماد کی نئی راہیں کھولنے کے ساتھ ساتھ مستقبل کی بائیونک ٹیکنالوجی کے امکانات کو بھی وسعت دے رہی ہے۔
