سردیوں کے موسم میں سب سے عام شکایت گلے کی خراش ہے جو نگلنے یا بولنے میں تکلیف، گلے میں جلن اور کبھی کبھار کھانسی کے دورے پیدا کر سکتی ہے۔ اگرچہ یہ مسئلہ عام ہے، لیکن گھریلو ٹوٹکوں سے اس میں بہت حد تک آرام حاصل کیا جا سکتا ہے۔
نمک کے نیم گرم غرارے گلے کی سوجن کم کرنے اور بیکٹیریا کو روکنے میں مدد دیتے ہیں جبکہ شہد اور گرم پانی یا چائے گلے کو نرم کرتے ہیں اور قدرتی اینٹی بیکٹیریل خصوصیات کی وجہ سے آرام پہنچاتے ہیں۔ ادرک کی چائے یا قہوہ گلے کی سوزش کم کرتا ہے اور کھانسی میں فائدہ مند ہوتا ہے۔ لہسن کے استعمال یا سوپ میں شامل کرنے سے بھی گلے کی خراش میں بہتری آتی ہے کیونکہ یہ قدرتی اینٹی بائیوٹک کا کام دیتا ہے۔
گرم سوپ اور یخنی نہ صرف جسم کو توانائی فراہم کرتے ہیں بلکہ گلے کی خراش میں بھی فائدہ مند ثابت ہوتے ہیں۔ لیموں اور نیم گرم پانی کے ساتھ شہد پینا وٹامن سی کا بہترین ذریعہ ہے اور گلے کی خراش کو کم کرتا ہے۔ بھاپ لینا اور دن بھر زیادہ پانی پینا بھی خشکی اور گلے کی جلن کو کم کرنے میں مؤثر ہے۔
سردیوں میں احتیاطی تدابیر اختیار کرنا بھی ضروری ہے۔ ٹھنڈے مشروبات، آئس کریم، زیادہ مصالحہ دار اور نمکین اشیاء، اور سگریٹ نوشی سے گریز کریں۔
گرم کپڑے پہنیں، ہاتھ صاف رکھیں، اور نزلہ یا بخار کی صورت میں آرام کریں۔ اکثر گھریلو ٹوٹکے، جیسے نمک کے غرارے، شہد، گرم سوپ اور بھاپ، گلے کی خراش سے تیزی سے نجات دلاتے ہیں، تاہم علامات برقرار رہیں تو ڈاکٹر سے مشورہ لینا ضروری ہے۔
