حال ہی میں ماہرین نے بتایا ہے کہ بڑھاپے کے اثرات کو کم کرنے اور مجموعی صحت کو بہتر بنانے کے لیے غذائیت سے بھرپور خشک میوہ جات کا استعمال نہایت فائدہ مند ہے۔ بادام، اخروٹ، پستہ، کاجو اور برازیل نٹس اپنی غذائی خصوصیات کی وجہ سے جسم اور دماغ دونوں کے لیے مفید ہیں۔
بادام وٹامن ای سے بھرپور ہوتے ہیں، جو جلد کو نقصان دہ شعاعوں سے محفوظ رکھتے ہیں اور جلد کی نمی کو برقرار رکھتے ہیں۔ ماہرین کے مطابق، بادام جلد کی صحت اور خلیوں کی مرمت میں مددگار ثابت ہوتے ہیں، خاص طور پر خواتین میں بڑھاپے کے اثرات کو کم کرنے میں مدد دیتے ہیں۔
اخروٹ میں الفا-لینولینک ایسڈ پایا جاتا ہے، جو ایک اومیگا-3 فیٹی ایسڈ ہے۔ یہ جسم میں سوزش کو کم کرنے کے ساتھ دماغی صحت کے لیے بھی مفید ہے اور عمر بڑھنے کے ساتھ ذہنی زوال کو سست کرنے میں مددگار ثابت ہوتا ہے۔ اخروٹ میں موجود اینٹی آکسیڈنٹس اور اینٹی انفلیمیٹری پولی فینولز یادداشت اور علمی افعال کو بہتر بنانے میں مدد دیتے ہیں۔
پستہ پروٹین اور اینٹی آکسیڈنٹس سے بھرپور ہوتا ہے، جو دیر تک بھوک کو قابو میں رکھنے اور وزن کو کنٹرول کرنے میں مددگار ہیں۔ پستے میں موجود اینٹی آکسیڈنٹس فری ریڈیکلز سے لڑنے میں معاون ہیں، جو خلیوں اور ڈی این اے کو نقصان سے بچاتے ہیں اور وقت سے پہلے بڑھاپے کے اثرات، ذیابطیس اور دل کی بیماریوں کے خطرے کو کم کرتے ہیں۔
کاجو دل کی صحت کے لیے مفید ہے اور اس کا باقاعدہ استعمال بلڈ پریشر اور ٹرائگلیسرائیڈ کی سطح کو بہتر بناتا ہے۔ یہ پروٹین، وٹامنز اور منرلز سے بھرپور ہوتا ہے، جو دل کی بیماریوں اور کورونری ہارٹ ڈیزیز کے خطرے کو کم کرنے میں مدد دیتا ہے۔
برازیل نٹس سیلینیم سے بھرپور ہوتے ہیں، جو قوتِ مدافعت اور تھائرائڈ کے نظام کو مضبوط بناتا ہے۔ یہ نٹس آکسیڈیٹو اسٹریس کو کم کرنے میں مددگار ہیں، جو خلیوں کو نقصان سے بچاتا اور کینسر، ذیابطیس اور دل کی بیماریوں کے خطرے کو کم کرتا ہے۔ علاوہ ازیں، برازیل نٹس میں میگنیشیم، فاسفورس اور صحت مند چکنائیاں بھی پائی جاتی ہیں، جو توانائی اور غذائی فوائد فراہم کرتی ہیں۔
ماہرین کا کہنا ہے کہ یہ میوہ جات نہ صرف جسمانی صحت بلکہ دماغی اور قلبی صحت کے لیے بھی فائدہ مند ہیں۔ تاہم، صحت کے حوالے سے کسی بھی نئی خوراک کو شامل کرنے سے پہلے اپنے معالج یا غذائیت کے ماہر سے مشورہ کرنا ضروری ہے
