پینسلوینیا کے شہر لٹز میں ایک ریلی سے خطاب کرتے ہوئے سابق امریکی صدر اور ریپبلکن صدارتی امیدوار ڈونلڈ ٹرمپ نے اعتراف کیا کہ 2020 کے صدارتی انتخابات میں شکست کے بعد انہیں وائٹ ہاؤس نہیں چھوڑنا چاہیے تھا۔ ٹرمپ نے کہا کہ انہیں اُس وقت انتخابات کے نتائج پر یقین نہیں تھا اور انہیں لگا کہ انہیں عہدہ نہیں چھوڑنا چاہیے تھا۔
اپنے خطاب میں ڈونلڈ ٹرمپ نے کہا کہ “ملکی تاریخ کی سب سے محفوظ سرحدیں میری صدارت کے دوران تھیں۔ ہم نے ملک کے لیے بہت اچھا کام کیا تھا، ہمارے پاس بے شمار کامیابیاں تھیں، لیکن آج ہر پولنگ بوتھ پر سیکڑوں وکلاء موجود ہیں۔”
ڈونلڈ ٹرمپ نے یہ بھی کہا کہ 2020 کے انتخابات کے بعد انہوں نے اپنی شکست تسلیم نہیں کی اور انتخابات کے بارے میں کئی سازشی نظریات کو فروغ دیا تھا۔ 2022 میں نیویارک ٹائمز کی رپورٹر میگی ہیبرمین کی ایک کتاب میں انکشاف ہوا تھا کہ ٹرمپ نے اُس وقت اپنے معاونین سے کہا تھا کہ وہ وائٹ ہاؤس نہیں چھوڑیں گے اور جو بائیڈن کو ذمہ داریاں سنبھالنے نہیں دیں گے۔
ٹرمپ کے مطابق، انہوں نے اپنے ایک معاون سے یہ بھی کہا تھا کہ “ہم یہاں سے نہیں جا رہے” اور ایک دوسرے معاون سے کہا کہ “جب آپ انتخاب جیت چکے ہیں تو آپ کیسے چھوڑ سکتے ہیں۔”
واضح رہے کہ اگلے امریکی صدارتی انتخابات 5 نومبر کو منعقد ہوں گے، جس میں ڈیموکریٹک امیدوار کملا ہیرس اور ریپبلکن امیدوار ڈونلڈ ٹرمپ کے درمیان کانٹے کا مقابلہ متوقع ہے۔
