شنگھائی تعاون تنظیم (ایس سی او) کا 23 واں سربراہی اجلاس آج اسلام آباد میں شروع ہو رہا ہے، جس کے لیے وفاقی دارالحکومت میں تمام تیاریاں مکمل کر لی گئی ہیں۔ اجلاس میں شرکت کے لیے سربراہان کی آمد کا سلسلہ جاری ہے۔ ازبکستان کے وزیراعظم ، چین کے وزیراعظم، بھارت کے وزیر خارجہ، ایرانی اول نائب صدر، قازقستان اور تاجکستان کے وزرائے اعظم سمیت کئی اعلیٰ سطح کے وفود اجلاس میں شرکت کر رہے ہیں۔
ترکمانستان اور کرغزستان سے بھی اعلیٰ سطح کے وفود، شنگھائی تعاون تنظیم کے سیکرٹری جنرل، اور بزنس کونسل کے چیئرمین بورڈ اجلاس میں موجود ہوں گے۔ اجلاس میں معیشت، تجارت، ماحولیات اور سماجی و ثقافتی روابط کے شعبوں میں جاری تعاون پر تبادلہ خیال کیا جائے گا، جبکہ تنظیم کی کارکردگی اور مستقبل کی حکمت عملی کا بھی جائزہ لیا جائے گا۔ تنظیم کے رکن ممالک باہمی تعاون کو مزید فروغ دینے اور بجٹ کی منظوری کے حوالے سے اہم فیصلے کریں گے۔
ترجمان دفتر خارجہ، ممتاز زہرا بلوچ کا کہنا ہے کہ اس اجلاس میں معاشی امور، تجارت اور کنیکٹیویٹی پر خاص فوکس رہے گا، اور رکن ممالک کے سربراہان کی شرکت پاکستان پر اعتماد کا اظہار ہے۔
اسلام آباد میں اجلاس کے لیے سخت سیکیورٹی انتظامات کیے گئے ہیں۔ اسلام آباد ٹریفک پولیس کے مطابق ریڈ زون کے تمام راستے بند کر دیے گئے ہیں، اور مختلف سڑکوں پر ٹریفک کی روانی متاثر ہو رہی ہے۔ پارک روڈ، راول ڈیم چوک، فیصل ایونیو، آئی جے پی روڈ، کشمیر ہائی وے اور بارہ کہو سے مری روڈ جانے والے راستے بند ہیں۔
