وزیراعظم پاکستان شہباز شریف نے منگل کے روز اس عزم کا اعادہ کیا کہ، پاکستان انڈونیشیا کے ساتھ اقتصادی، تزویراتی، تجارتی، دفاعی اور دفاعی پیداوار سمیت تمام شعبوں میں دوطرفہ تعاون کو فروغ دینے کے لیے پُرعزم ہے۔
وزیراعظم نے یہ بات انڈونیشیا کے وزیر دفاع لیفٹیننٹ جنرل (ریٹائرڈ) سیافری شمس الدین سے ملاقات کے دوران کہی۔وزیراعظم آفس کی جانب سے جاری کردہ اعلامیے کے مطابق، وزیراعظم نے کہا کہ، پاکستان اور انڈونیشیا کے درمیان دیرینہ دوستی ثقافتی، مذہبی اور تاریخی اقدار پر مبنی ہے اور دونوں ممالک عالمی فورمز پر ایک دوسرے کی حمایت کرتے ہیں۔
وزیراعظم شہباز شریف نے قاہرہ میں جی-8 سربراہی اجلاس کے موقع پر انڈونیشی صدر پرابوو سبیانتو سے ہونے والی ملاقات کا حوالہ دیتے ہوئے ان کے لیے نیک خواہشات کا اظہار کیا۔
ملاقات میں پاکستان اور انڈونیشیا کے درمیان تاریخی، برادرانہ اور دوستانہ تعلقات کو اجاگر کیا گیا اور دوطرفہ کثیرالجہتی تعاون کو مزید فروغ دینے کی اہمیت پر زور دیا گیا۔
وزیراعظم نے پاکستان کی جانب سے انڈونیشیا کے ساتھ باہمی مفاد پر مبنی منصوبوں میں مشترکہ سرمایہ کاری کی تلاش اور توسیع کے عزم کا اعادہ کیا۔
انہوں نے پاکستان اور انڈونیشیا کے درمیان دفاعی تعاون کے معاہدے کے تحت جاری اقدامات کا جائزہ بھی لیا اور باہمی دلچسپی کے اہم شعبوں میں منصوبوں پر عمل درآمد تیز کرنے پر اتفاق کیا۔
لیفٹیننٹ جنرل (ریٹائرڈ) سیافری شمس الدین نے وزیراعظم اور پاکستانی عوام کے لیے انڈونیشیا کے صدر پرابوو سبیانتو کی جانب سے نیک تمناؤں کا پیغام پہنچایا۔
انہوں نے پاکستان کے ساتھ دفاعی تعلقات کو مزید مضبوط بنانے اور بالخصوص دفاعی پیداوار میں تعاون کے ممکنہ شعبوں کو تلاش کرنے کے انڈونیشیا کے عزم کا اعادہ کیا۔
