ازبکستان کے دارالحکومت تاشقند کے خوبصورت اور فطری مناظر سے مالامال بوستان لیک ضلع کو ملکی و غیر ملکی سیاحوں کی جانب سے بے حد سراہا جا رہا ہے۔ ضلع میں سیاحت کے فروغ کے لیے سازگار حالات اور مواقع موجود ہیں، جن سے بھرپور فائدہ اُٹھانے کے لیے بڑے پیمانے پر شجرکاری اور تزئین و آرائش کے منصوبے جاری ہیں۔
انہی اقدامات کا ایک نمایاں مظہر “چارواک گیٹ” رہائشی کمپلیکس ہے، جس کا آج باقاعدہ افتتاح کیا گیا۔ افتتاحی تقریب میں ریاستی اور عوامی تنظیموں کے نمائندوں، علاقائی سماجی رہنماؤں، دانشوروں اور نوجوانوں نے شرکت کی۔
اس موقع پر تاشقند ریجن کے نائب حاکم برائے مالیات، معیشت اور غربت میں کمی، اوتابیک تورسونوف اور ازبکستان کے نیشنل بینک کے چیئرمین علی شیر مرسواتوف نے خطاب کرتے ہوئے کہا کہ یہ منصوبہ نہ صرف عوام کے لیے سہولیات فراہم کرے گا بلکہ ریجن کی سیاحتی استعداد میں نمایاں اضافہ بھی کرے گا۔
تقریب میں بتایا گیا کہ دسمبر 2024 میں صدر شوکت مرزائیوف نے تاشقند ریجن کے دورے کے دوران اس منصوبے کا جائزہ لیا تھا اور سیاحت کو فروغ دینے اور عوام و سیاحوں کے لیے سہولیات بڑھانے کے حوالے سے اہم ہدایات جاری کی تھیں۔
تقریب میں اس پراجیکٹ کی تفصیلات پیش کی گئیں اور شرکاء کے لیے معروف فنکاروں کی شرکت سے ایک رنگا رنگ کنسرٹ بھی منعقد کیا گیا۔
ماہرین کے مطابق تاشقند ریجن میں سیاحت کو مخصوص شعبوں میں ترقی دینے کے لیے ایک جامع پروگرام منظور کیا گیا ہے۔ اس پروگرام کے تحت 2025 تا 2026 کے دوران 3 ارب 28 کروڑ 50 لاکھ امریکی ڈالر کی لاگت سے 265 سرمایہ کاری منصوبے شروع کیے جائیں گے، جن میں 1 ارب 91 کروڑ 40 لاکھ ڈالر غیر ملکی سرمایہ کاری پر مشتمل ہوں گے۔ ان منصوبوں کی تکمیل سے 14,487 نئی ملازمتوں کے مواقع پیدا ہوں گے۔
