چالاک سیلز مین نے کروڑوں روپے لینے والی بالی وڈ اداکارہ سارہ علی خان کے ساتھ ہاتھ کر لیا ، چالاک سیلز مین نے اداکارہ سے مفت میں اپنی پراڈکٹ کی تشہیر کرادی۔
اداکار سیف علی خان کی بیٹی سارہ علی خان کئی فلموں میں اداکاری کر چکی ہیں ۔ رپورٹس کے مطابق اداکارہ کسی بھی پراڈکٹ کی تشہیر کیلئے ایک کروڑ بھارتی روپے معاوضہ وصول کرتی ہیں۔
لیکن ایک ہوشیار سیلز مین نے اداکارہ سے اپنے مقامی برانڈ کی مفت میں ہی تشہیر کرادی اور ویڈیو سوشل میڈیا پر وائرل بھی ہوگئی۔وائرل ویڈیو میں سارہ علی خان کو جم سے نکلتے دیکھا جا سکتا ہے ۔ ایک سیلزمین مداح کے روپ میں اداکارہ سے ملتا ہے اور ہاتھ میں پکڑے پیکٹ کا بتاتا ہے۔
اتنے میں اداکارہ گاڑی کی طرف بڑھتی ہیں تو تو سیلز مین بھی ان کے پیچھے آتا ہے اور تصویر کھنچوانے کی درخواست کرتا ہے ، جس پر وہ ہاتھ میں پکڑے پیکٹ کے ساتھ ہی اداکارہ کے ساتھ تصویر بناتا ہے اور پھر وہ پیکٹ سارہ علی خان کو تھما دیتا ہے۔
تاہم سیلز مین کے اس عمل پر سوشل میڈیا پر بحث چھڑ گئی ہے، کئی نے اس چالاک سیلز مین کے طریقہ کار کی تعریف کی ہے تو کسی نے اسے شدید تنقید کا نشانہ بنایا ہے ۔
ایک صارف نے سیلزمین کو “سال کا بہترین سیلزمین اور مارکیٹر” قرار دیا ہے تو ایک اور صارف نے لکھاکہ دماغ ہو تو سب کچھ ممکن ہے۔بعض صارفین نے اداکارہ کو سیلزمین اور اس کی پراڈکٹ کے خلاف قانونی کارروائی کا بھی مشورہ دیا ہے ۔
