ایرانی مسلح افواج کے چیف آف جنرل اسٹاف میجر جنرل ڈاکٹر محمد باقری نے صدر مملکت آصف علی زرداری اور آرمی چیف جنرل عاصم منیر سے علیحدہ علیحدہ ملاقاتیں کی ہیں۔
دورہ پاکستان پر موجود ایرانی مسلح افواج کے چیف آف جنرل اسٹاف میجر جنرل ڈاکٹر محمد باقری پیر کے روز ایوان صدر پہنچے جہاں انہوں نے صدر مملکت آصف زرداری سے ملاقات کی ۔ دونوں رہنماؤں کے درمیان دو طرفہ اہمیت کے امور پر تبادلہ خیال کیا گیا۔
ملاقات میں پاکستان اور ایران کے درمیان دیرینہ اور برادرانہ تعلقات کی اہمیت کو بھی اجاگر کیا گیا جبکہ دونوں برادرممالک کے باہمی مفاد میں تجارتی اور اقتصادی تعلقات کو فروغ دینے کی ضرورت پر بھی زور دیا گیا۔
اس موقع پر صدر مملکت آصف علی زرداری کا کہنا تھا کہ دہشت گردی دونوں ممالک کیلئے مشترکہ چیلنج ہے اور اس سے نمٹنے کیلئے دونوں ممالک کو مؤثر اور مربوط اقدامات کرنے کی ضرورت ہے۔
ایرانی مسلح افواج کے سربراہ نے غزہ اور لبنان پر پاکستانی مؤقف کو سراہا۔
پاک فوج کے شعبہ تعلقات عامہ ( آئی ایس پی آر ) کے مطابق ایرانی آرمی چیف میجر جنرل ڈاکٹر محمد باقری نے جنرل ہیڈ کوارٹر ( جی ایچ کیو ) راولپنڈی کا دورہ کیا جہاں انہوں نے آرمی چیف جنرل سید عاصم منیر سے اہم ملاقات کی۔
آئی ایس پی آر کے مطابق جی ایچ کیو میں میجر جنرل محمد باقری نے یادگارِ شہدا پر پھول رکھے اور پاک فوج کے چاق وچوبند دستے نے انہیں سلامی پیش کی ۔
دونوں سربراہان کے درمیان علاقائی سلامتی کی موجودہ صورتحال اور دوطرفہ دفاعی تعاون پر بھی تبادلہ خیال کیا گیا۔
